Libya4ever                 ليبيا أبدا

شر البلية ...

جاء الخبر التالي في جريدة الرأي الأردنية:" عمان - بترا - القدس المحتلة - الرأي - استنكرت الحكومة الأردنية ودانت بشدة تواصل العمليات العسكرية الإسرائيلية ضد المدنيين الأبرياء العزل في قطاع غزه وإصرار إسرائيل على ممارسة سياسة القتل العشوائي دون مبرر." 

المسئولون الأردنيون يطالبون إسرائيل بعدم القتل العشوائي غير المبرر !!!

وزير الدفاع الإسرائيلي برر القتل العشوائي فقال: 

1.                           أهل غزة لا يوجد لديهم خبز منذ حصارنا لحماس ويموتون على البطيء جوعاً، قتلهم أكثر راحة لهم وعملاً بحديث نبيهم " إذا قتلتم فأحسنوا القتلة وإذا ذبحتم فأحسنوا الذبحة"

2.                           القتل العشوائي عدالة ، حيث لا نفرق بين صغير ولا كبير ، رجل أو امرأة  "الكل لازم يموت خبيبي"  واحنا أصحاب عدالة مو مثل العرب.

3.                           أهل غزة ما بيعرفوا النظام على شان يصفوا طابور ونذبحهم بالدور

4.                           جيش دفاع بخاف يقرب لأنه الغزاوية مسلحين بأحزمة ناسفة من الفلفل وعبوات مليئة بالشطة.

5.                           غزة من أكثر المدن كثافة سكانية ولازيم نخفف عدد سكان على شان اللي بيضل يعرف يعيش. شوفوا احنا بنعمل خير ...

6.                           أهل غزة صوتوا لحماس ، وحماس إرهابية ، إذن هم يدعمون الإرهاب ... ونحنا ما راح نتفرج على شعب بدعم إرهاب. 

العرب قرروا يقدموا مساعدات ويكسروا الحصار:

1.      وليد جنبلاط وعد يبعث مجموعة من حزبه يساعدوا بعملية القتل العشوائي على شان يكملوا مهمة أحد مسئولي الحزب اللي انكشف انه موساد وشغال على ودنه من عشر سنين.

2.      خدام عرض يبعث لإسرائيل خبراء في القتل العشوائي لأنه عنده خبرة ثلاثين سنة من أيام حماة وتدمر مقابل دعمه من قبل إسرائيل ليصير رئيس لسوريا.

3.      سعد الحريري عرض على الرئيس عباس يستثمر على شواطئ غزة مسلخ  واقترح يسميه "مسلخ الشهداء"

4.      الوليد ابن طلال حب ينافسه فعرض على إسرائيل وعباس مسلخ بكل حي مخصص لكل فصيل " مسلخ الفتحاوية" "مسلخ الحماسية" إلا الجبهة الشعبية لأنهم كفار  قرر يعمل الهم محرقة.

5.      القذافي شاف غزاوي  "مجعمز غادي" متخبي عن القذائف ، بلغ عنه لإسرائيل على شان يثبت حسن نيته وإنه مع السلام العادل .

6.      البرلمان الفلسطيني مشغول بتقسيم الأيتام اللي نذبحوا أهلهم بين رئيس السلطة ورئيس الدولة ...

7.      مفتي الأزعر طلب عدم تسليم أي طفل لمحمود عباس خوف يصيروا الأطفال الفلسطينيين بهائيين.

8.      الملك عبدالله تبرع للغزاوية بجرافات على شان دفن القتلى وبثمن أكفان من غنائمه بلاسفيجاس.

9.      شيوخ الخليج رفضوا يتبرعوا بأي شي لأنه الفلسطينية وقفوا جنب صدام في احتلال الكويت

10.  عباس رد عليهم "يا مفتريين" احنا وقفنا وراه مش جنبه واللي قبض الثمن مات وورث المصاري لمرته اللي دايره على حل شعرها.

11.   سهى الطويل ردت لا والله آخر تسريحه كانت جدايل وشعرها مش حل

12.  عباس اعتذر ووضح بيانه " سهى بآخر تسريحه دايرة على جدايل شعرها مش حل شعرها"

13.  رانية العبدالله بعثت للغزاوية 500 قلم كحل ، و30000 علبة مسكرة  وحومرة وبودرة، وتبرعت بمايوهاتها اللي كانت تسبح فيهم على شواطئ أوروبا.

14.  حماس رفضت إدخال المكياج والمايوهات لأنه فرضت على الفلسطينيين للرجال دشاديش وللنسوان عبايات

15.  أبو قريع استولى على شحنة المكياج والمايوهات  وباعها بالسوق السوداء الإسرائيلية لأنه الإسرائيليات بحبن المكياج الملوكي والراباي أفتالهم يبينوا كل شي لإغراء السياح الأردنيين والأيدي العاملة الأردنية اللي طالعة نازلة ميشان التطبيع.

16.  الرجوب والطريفي ودحلان بلعبوا دك طرنيب  وصرح دحلان للفضائية الجزائرية " ترى أنا حاط همي بـ.... عمي"

17.   فضائية الجزيرة معطلة عن الشغل حداد على الزرقاوي ، وفضائية أبو ظبي لسه حادة على الشيخ زايد الله يرحمه ، فضائية اليمن بتصور فيلم  (للقات أوقات) بطولة عبدالله الأسمر بالاشتراك مع علي عبد الله صالح والمرشحة الجديدة للرئاسة ، أما فضائية عمان فهي مشغولة ببث حارة أبو عواد بث مباشر من مجلس الأعيان ، والفضائية المصرية قطعت الفيلم العربي عند لقطة " حتجوزه يا بابي" وستتابع بعد تصوير الرئيس مبارك في رحلته للشاليه اللي على البحر ، أما الفضائية السعودية فقد التزمت عدم التصوير لأنه التصوير حرام خاصة انه القاذفات الإسرائيلية بتسلخ اللحم عن العظم وما يجوز الناس تشوف هيك عورات.

18.  الأمير حسن يقيم ندوة حول التلاقح الحضاري بين أبناء إبراهيم ، لتوليد حضارة جديدة مؤمنة بالسلام العادل .

19.  الأميرة سروة طلبت من إذاعة الأردن نقل خبر لكل اللي بدهم يتلقحوا حضارياً ، واستثنت حالها بحجة أنها مش من بنات إبراهيم ، هي من الجنس الآري بس سمرة شوي، وكمان الأمير حسن مو مقصر بالتلقيح الحضاري بس الساري الباكستاني عنده مناعة وما راح تغيره، ولأنه الشرس الأردني لونه أسود ما بناسب لونها .

حتى الخبر ما عادت جرائدنا بتعرف تصيغه، والحكومة بتخاف من تصريحاتها ، شو اللي صاير بالدنيا يا حكومتنا ... هو فيه فرق بين ذبح عشوائي وذبح على الدور ، يعني لو الزرقاوي جاب أهل العرس المساكين وصفهم على الدور وذبحهم ما بكونش إرهابي ...؟!!! الله يستر من هيك تصريحات ، يعني لو حدا احتل بلدنا بتنصحونا نوقف على الدور للذبح والسلخ ؟ والا على الحروف الأبجدية ... إذا هيك بكرة بحول اسمي من صلاح ليوسف على شان يكون دوري بالأخير ... والله يعين هاللي أساميهم إبراهيم واحمد ... كنت أغار منهم واحنا بالابتدائي لأنه دورهم بيجي قبلي بكل شي ... لكن هسه وحسب تصريحات حكومتنا ما بينحسدوا لأنها صارت المذابح على الدور ...

صلاح الـمومني